Mataio 16, 13-20

Mataio 16:13-20.

                        O vai te Tamaiti a te Atua.

                        Ietu te Metia a te Atua ora.

                        Te taviri o te Patireia.

                        Eiaha e faaitehia.

                        Ei manao matamua.

                        I mua i teie  mau  taioraa,te ite  nei tatou mai teihea to te mau tavini  faaiteraa i te maitai  o te Atua na roto i te faaroo.Te faaitotito nei te Atua i to na nunaa,ma te horoà ia ratou te taviri o to na ùtuafare.I reira ratou e ite ai te torono ùnaùna o te arii.Teie ra,eita te mau huru  taata atoà e ô i reira,te feia e noaa ia ratou taua taviri ra,

                        1) Te feia ia tei tiàturi papu i te Atua,ma te faaohipa i to ratou faaroo.

                        2) Tei faeà fatata noa i pihaiiho i te parau a te Atua.

                        3) Tei faaohipa i ta na tareni ma te taime ore.

                        4) Tei ore i haapao hoê noa pae,tei haapao ra i te mau ohipa atoà o te faaroo.

            Na teie mau faahioraa,e faaite ia tatou e, te vai ra te tauturu a te Atua i nià i te feia paieti,àreà ra no te feia paieti ore te titauhia nei ia,ia faahaèhaa i mua i te mata parautià o te Atua.Ia tià i te parau a te Atua ia aratai ia ratou i roto i te haamaitairaa mure ore .Ia ore ia tupu mai te tahi mau uiuiraa manao tià ore.Te ite nei o Ietu i te reira mau manao i roto i ta na mau pîpî,i ui ai o Ietu ia ratou,O  VAI  AU TE TAMAITI  NEI I TA TE TAATA NEI PARAURAA ? TE PITI NO TE UIRAA, O VAI RA VAU  NEI  I TA OUTOU  NA PARAURAA ?

            Ia hio maitai änaè tatou i teie na uiraa a Ietu,tei roto ia o ia i te hoê titorotororaa manao ei haapapuraa i to na tiàraa Tamaiti na te Atua i ropu i to na nunaa.Ma te fafa  ätoà  te manao e parauhia ra no na i roto i te rahiraa taata,e i roto i ta na mau pipi iho tei àpee noa ia na i te mau taime ätoà,e i te mau vahi ätoà ta na e haere nei.Teie ohipa ta Ietu e rave nei no te faaàpiraa ia i te faanahoraa e orahia nei e to na nunaa ma te horoà i te hoê tiaitururaa no te patireia o te Atua.Te tiaitururaa o Ietu i te ohipa ta na e rave nei ia tiàturuhia ia e te mau taata ätoà,teie ia mau uiuiraa manao ta na e rave nei.Eiaha  ra i roto i tera  manao e,te paruparu nei O ia i te ohipa ta na e rave nei,eita roa ia,tei roto ra i tera manao e,o vai tei maramarama i ta na titauraa i te mau taata ätoà tei faaroo i ta na mau äoraa,o vai tei tiàturi i ta na mau temeio,o vai tei mahanahana i ta na mau faaoraraa mai,e o vai te taata tei ite i roto i te ohipa ta na e faatupu nei te mau hinaaro o te Atua.Eiaha ra tatou ia manao e te faateitei nei o Ietu ia na aita roa ia.Te uiui nei ra o Ietu mai te metua e uiui nei,ia moe ta na mau tamarii ia na.

            I tupu ai te manao e,e rave teie na uiraa na Ietu ei parau äè no tatou,e ia tià atoà ia tatou ia pahono ia Ietu mai ta na e tiai mai nei ia tatou.

                        Ei manao tatara.

            Ta tatou parau tei te irava 13 i te vahi hopeà,e tei te irava 15 i te vahi hopeà,no te Mataio pene 16.I teie na uiraa a Ietu i nià i ta na mau pîpî.

                        O VAI  AU  TE TAMAITI A  TE TAATA  NEI  I TA TE TAATA  NEI PARAU-

                        RAA ?

                        O VAI  RA  VAU NEI I TA OUTOU NA PARAURAA ?

            Ua tupu teie parau ta tatou i to Ietu haereraa  i Taitarea Firipi,teie oire tei te pae Repanona  no te fenua ra o Turia e i Titona.Teie vahi tei raro noa mai i te tupuai mouà ra no Heremona.Na Herota Firipi piti i patu i teie oire,ma te tuu i teie ioa ia Taitarea,i teie mahana aita faahou teie oire ua ore roa,te puna pape noa tera e vai mai ra i teie mahana.

            I muri iti noa äè i te mau ohipa maere i ravehia e Ietu,te faaàmuraa temeio i te mau taata e rave rahi,(Mat:14:13-21),te haereraa na nià i te miti,(Mat14:22-33)e te faaoraraa i te tamahine e te vahine àti Tanaàna,(Mat 15:21-28).

            E i roto i ta tatou parau no teie  hora paieti,te ui  nei o Ietu i ta na mau pîpî e piti uiraa hoê te hioraa a te mau taata ia na e ta ratou e maramarama i nià i te mau ohipa ta na e rave ra i te ioa o te Atua.Te piti ra ,te hioraa ia a te mau pîpî ia na e ta ratou e maramarama.E aha te auraa no teie na uiraa.Eita e ore te ite nei o Ietu i roto i ta na mau pîpî i te hoê vahi papu ore no to ratou tiàturiraa i te ohipa ta na e rave nei  mea maitai iho-a  ia,ia  uiui O ia i ta na mau pîpî teihea atu ra ia ratou i te faaearaa,tei nià änei ra i te hoê fatu,tei faaora i te mai,tei faaàmu i te taata i te maa,e aore ra i te hoê fatu tei horoa i te haapiiraa nehenehe ati ra atu ai.Ua tano iho-a ra o Ietu i te uiraa i teie na uiraa e piti,i te mea aita iho-a te mau taata i maramarama e o vai o Ietu,te hioraa a te mau taata,o Ietu,

                                   O Ioane Papetito,te taata ia i poro te parau no te tatarahapa.

                                   O Eria te perofeta ia i àro i te mau perofeta a Paara.

                                   O Ieremia te perofeta tei pii i te nunaa o te Atua ia hoi i nià i te ora mau.

                                   E aore hoê o te mau perofeta.

            O teie ia ta te mau taata i maramarama i roto i te taaroàraa no te  mau ohipa i faatupuhia e Ietu.Aita o Ietu i riro i roto i te tiàturiraa no te mau taata e,e Tamaiti na te Atua,tei tonohia mai,ua riro noa ra o Ietu mai te hoê o te mau perofeta,tei î i te mau hinaaro o te Atua,ua oti ätu ai.

            Te manao ra o te mau pîpî tei na roto mai ia Petero, o te pahonoraa ia ta Ietu e tiai nei,o te Metia oe te Tamaiti a te Atua ora. I nià i teie faîraa faaroo o Ietu e haamau ai i te Etaretia ora a te Atua.O teie te papa no te ora mure ore,te tià ia haapaohia e te mau taata ätoà tei tiàturi i te mau ohipa maere tei ravehia e Ietu.Ua faaroo è na tatou i te piiraahia o Ietu i te Tamaiti a Tavita,ua faaroo ätoà tatou i to na faahotanaraahia,to na faainoraahia,to na tahitohitoraahia,e to na àtaraahia i nià i te tatauro.E to Ioane Papetito parauraa e a hio na i te àrenio a te Atua tei hopoi-ê i te hara a to te ao.Areà ra teie ta tatou e faaroo nei,o te faaàpiraa ia te reira i te titauraa i te  Atua,te Metia te Tamaiti a te Atua ora.O te hoê teie haapapuraa,o Ietu te Metia,i tiai maorohia e te mau perofeta,o ia te tià e iriti i te ùputa no te ora mure ore i te mau taata tei ore i àueue te faaroo.Te riro nei o Ietu mai te hoê Metua àpi i roto i te oire no te feia  Moà.Tei  faateiteihia e te Atua,ma te faaàhu i te àhu àpi no te hau.E te riro atoà nei O ia ei taviri no te ùtuafare no te Atua.Ia noaa te tatarahaparaa i te paieti ore,ei ia ànaàna te parautià a te Atua i roto ia ratou no te hoê tiaturiraa papu,ia ore te Tamaiti a te Atua ia faaau haere-noa-hia,i te tahi atu mau huru taata e aore ra hohoà taata.

            Ia tià ra i te taata ia ite, te pâpâ no te Etaretia a te Atua ora,tei nià ia i te Metia,eita ra tei nià ia Petero.O Petero e mauhaa noa o ia ei faaiteraa i te mau faanahoraa a te Atua,e ei pahonoraa i te mau uiraa a Ietu.Oia atoà ia tatou e mauhaa ätoà tatou no te mau ohipa a te Atua, i teie mahana  te ui ätoà mai nei o Ietu ia tatou i teie na uiraa,E aha ta tatou pahonoraa ? E aha to tatou manao ?

            Te fatata nei tatou i te piti hanereraa te matahiti i teie nei te ui noa mai ra o Ietu ia tatou e O vai o ia i ta tatou parauraa ?

Teraì òr.