Hoêraa o te maru Metia Papa Haamori pureraa tau 2015

Te Papa Haamori no te pureraa tau, 2015.

Himene tomoraa

E te Tumu Nui e, te Fatu o te òhipa ta mätou e rave nei, haamaitaì, faateniteni mätou i to òe iòa moà mai te rau haari e tähiri nei i roto i te reva no te färii Maeva ia òe, to mätou ia hinaaro rahi i te ômuaraa o teie tau âpï ta òe i ìriti e ta òe e höhora nei i mua ia mätou, e färii Maeva mätou ia òe, e tätou aè ia haere, e na òe e faanaho i to tätou haereà ia tupu mau to òe hinaaro, to mätou ia ora.

Himene

Räutï : Teie te reo o te Atua i roto i te ômuaraa o teie tau âpï : A hiò na i ta ù tävini, ta ù i faatoa, ta ù i mäìti tei riro èi mauruüruraa na ù. Ua tuu vau i ta ù värua i nià ia na, e faaìte haere o ia i te parau-tià i te mau nünaa atoà.

Âmui : Mauruüru e te Tumu Nui no teie reo o tei faaìte mai i to òe tiàturi ia mätou, to òe nünaa i te haafätataraa atu ia òe na. Te ìte nei mätou e, nä roto i teie parau, te faatoro nei

òe i mua ia mätou i te èà e ìte ai mätou i ta òe ôpuaraa faaora no mätou. Hö mai òe ia mätou te âau faaroo Mäòhi mau no te ìteraa e te färiiraa atu i ta òe tïtauraa ia mätou to òe nünaa.

Räutï : E te Tumu Nui e, a faatoa òe ia mätou i te tomoraa atu i roto i to òe na mau hinaaro, ia ìteä ia mätou te faufaa rahi no te tupuraa o te hoêraa o to òe nünaa e te mau nünaa atoà o te ao nei.

Âmui : Tuu mau i ta òe parau i roto i to mätou âau ia riro e, na to na märamarama e ärataì i to mätou haereà nä nià i te taìäraa o te oraraa nei. Ninii mai i to värua moà i nià ia mätou ia riro o ia ei rima òhipa no òe i roto i to mätou tere nä nià i te èà o te hoêraa, hinaarohia e òe na.

Himene

Täiòraa parau

Himene

Faaitoitoraa

Pure ia au i te tumu parau

Himene

Fäìraa faaroo

Räutï : I te ômuaraa o teie tau âpï, te fäì nei tätou i to tätou faaroo i te Atua, te tumu o te parau e ärataì nei ia tätou, te parau e tähoê nei ia tätou i roto i ta na ôpuaraa faaora.

Âmui : Te fäì nei tätou e, ua tuu mai te Atua Metua i te ora i mua i te mata o teie nünaa mäòhi, e ua tanu roa o ia i te reira i nià i teie fenua, oia te here e te aroha, e aita te fenua e faaea nei i te faaìte mai i te reira i te taata e ua tae roa te Tämaïti a te Teitei i te täutururaa mai ia tätou i te ìteraa e te färiiraa i te reira nä roto i te parauraa mai e, a rave mai a àmu, a rave mai a ïnu, o vau atoà te tupuraa o te here o te Atua. Hoê ä ta te fenua faaìteraa e ta te Tämaïti, ia noaa to tätou ora, te ora tei riro te Atua ei tumu hoê roa.

Räutï : Te nünaa faaroo no ............................................., teie te haapotoraa no te ture ta Ietu i horoà mai : Here i te Atua, here ia òe iho, ei räveà e ìte ai òe i te here i te täuaro.

Âmui : Te fäì nei tätou e, aita e taata e aita te Atua i tuu i te huero no te aroha i roto ia na, teie te mea ta te Atua e tiaì mai ra ia hotu teie nünaa, ia riro te reira ei òaòaraa, ei hanahana no te Atua Metua.

Räutï : Te fenua, te parau ia a te Atua i riro mai ei fenua, tei au hoì i te huru e te hohoà o te Tumu Nui.

Âmui : Te fäì nei tätou e, e faaìteraa tüatau ta te fenua i te Aroha e te Here o te Atua i te taata nei. E tïtauraa na te Tumu Nui i te nünaa Mäòhi e, ia hiò e ia faaroo i te èà ta te fenua e faatoro noa ra i mua ia na. Amene.

Himene

Ôroà a te fatu

Parau faaära, püpüraa moni

Himene âmui

TE PAPA HAAMORI NO TE ÔROÀ A TE FATU

(No te ìritiraa e te ôpaniraa)

ÔMUARAA

I teie taime e te mau Maru-Metia, ua âmui mai tätou no te haapäpü i to tätou manaò turu, e te färii i te ôpuaraa faaora a te Atua, o ta te fenua e te moana e höroà noa mai ra, e o ta te Tämaïti, te Fatu iho o te rähu i haere mai e faaìte. A ìriti i te ùputa o to tätou âau i te parau âmuiraa e : E te Atua e, o Òe te Fatu o te mäa e te pape o to ù fenua, o ta ù e àmu nei, e, e ïnu nei, ei täuturu, ei faaitoito ia ù i roto i to ù oraraa. Haapii mai ä òe ia ù i te ìteraa e, teie mau maitaì e tupu nei, no roto i te fenua e to te tai atoà, e täpaò anaè ia no to òe here e to òe aroha i te taata. Ia haamaitaìhia òe e te Fatu o tei haere mai e haamäramarama ia mätou i te faufaa ora no roto i ta òe ôpuaraa, ia ora to teie nei ao, o ta te rähu e faaìte noa mai ra.

HAAMANAÒRAA

O tätou i âmui mai no te haamanaòraa i te òhipa i rävehia e to tätou Fatu o Ietu-Metia, a faaâpï ai o ia i te faaauraa i rävehia e te Atua i roto ia na e te taata nei, a faaroo mai tätou i te mau parau i haamau i te ôroà.

Ua putuputu iho ra Ietu e nä Pipi tino àhuru mä piti atoà i nià i te àmuraa mäa i te ruì i haavarehia mai ai o ia ra. Ua räve Ietu i te faraoa, e ia oti ta na haamaitaìraa i te Metua, vavahi iho ra e höroà atu ra na te mau pipi, nä ô atu ra « A räve a àmu, o to ù tino tenä o tei püpühia no òutou ».Ua räve mai ä Ietu i te âuà, ia oti aè ta na haamaitaìraa i te Metua, ua höroà atu ra na te mau pipi. Teie ta na parau : « A rave a ïnu, o to ù toto tenä, te toto o te faaauraa âpï o tei haamaniihia no te taata e rave rahi ia tupu te hau o te Atua ».

Haamanaò tätou e, te ôroà a te Fatu, e tupuraa te reira no te haèhaa e te hau o te Atua i nià i te fenua. E täuturu atoà te reira i te taata, o tei färii maitaì i te pohe e te Tiàfaahouraa o te Metia, i te hereraa i te rähu e te Fatu o te rähu. No reira, te faraoa o te Ôroà, o te parau ia no te here e te aroha o te Atua o tei höroà mai i te tïtona mai roto mai i te fenua, o ta Ietu i parau e, o to na ia tino. Tätou te Mäòhi, oia atoà te mau mäa rau e tupu nei i nià i to tätou fenua, e täpaò

anaè no te here e te aroha o te Atua ia tätou. Te uaina o te Ôroà, o te parau ä ia no te here e te aroha o te Atua o tei höroà mai i te vine mai roto mai i te fenua, o ta Ietu i parau e, o to na ia toto. Tätou te Mäòhi, oia atoà ta tätou pape, te pape haari e hotu maitaì nei, e täpaò atoà te

reira no te here e te aroha o te Atua.

No reira, te mau mäa rau atoà o te fenua nei, e to te mau motu nei, no roto anaè ia i te Parau Maitaì a te Atua, te Tumu Nui tei rähu i teie nei ao. Ia haamaitaìhia te Atua te Tumu Nui no to na here e to na aroha ia tätou o ta te Tämaïti i haere mai e faaìte.

(E tià tätou)

HAAMAITAÌRAA

E te Tumu Nui e, te Fatu no te mäa o ta mätou e àmu, te haamaitaì nei mätou ia òe no to òe here e to òe aroha ia mätou, ta te faraoa, te taro, te uhi, te ûmara etv… e faaìte noa mai ra.

E te Tumu Nui e, te Fatu no te pape o ta mätou e ïnu, te haamaitaì nei mätou ia òe no to òe here e to òe aroha ia mätou, ta te uaina, te vai haari, te Vai Mäòhi, etv… e faaìte noa mai ra.

FÄRIIRAA

A haere anaè mai e färii i te täpaò no te here e te aroha o te Tumu Nui o ta te Ôroà a te Fatu e haamanaò noa mai ra.

IA OTI TE FÄRIIRAA

Haamauruüru maitaì e te Atua te tumu o to mätou ora. Nä roto i te Ôroà nei, ua faaìte mai ä òe i te rahi o to òe here e to òe aroha ia mätou, o ta te rähu e heheu noa mai nei. Ia riro mau mätou ei mau ÌTE no teie nei parau. E te Tumu Nui e, a faarahi mai i to mätou faaroo.

HIMENE ÂMUI

PURE A TE FATU

HAAMAITAÌRAA